Ungkup Pelin Besai Bagi Karan Ba Kandang Menua Pesisir Sarawak

1.UNGKUP PELIN BESAI BAGI KARAN BA KANDANG MENUA PESISIR SARAWAK

Perintah Nengeri udah meri ungkup penyampau RM2.37 bilion ba baruh Projek Rayat dikena ngenyampatka pelin besai karan di menua pesisir.

Ku Menteri Utiliti, Dato Sri Dr. Stephen Rundi Utom, projek benung dipenyadi baka ke diripihka lalu enti nyema tembu pekara tu ulih ngemansang agi tikas kuasa karan di selampur menua pesisir ari 92 nyentuk 97 persen rambau ujung taun 2020.

Ku iya, perintah Sarawak chakah ati deka nyeleti ngambika nadai rayat ti tinggal ari ngasaika perengka guna bekal karan pengelama 24 jam.

2.PROJEK ENDUR PEJALAI BAS RAPID TRANSIT (BRT) DALAM PELIN TAUN 2020

Projek Endur Pejalai Bas Rapid Transit (BRT) dipelin deka dipenyadi ba taun 2020 bagi nyambung pejalai Kuching Sentral terus ngagai endur tebing sungai Kuching.

Ku Menteri Perengka Pengangkut Sarawak Datuk Lee Kim Shin, projek nya deka diatur Opis Kereja Raya (JKR) sereta opis menteri nya.

Nambahka nya ku iya, Sarawak benung bejalaika projek perintis ba baruh inisiatif Pemansik enggau Pemansang Pekara Guna Nengeri senentang gis hydrogen.

Bagi pekara nya ku iya, opis menteri iya gawa enggau chakah dalam operasyen bas sel kereban api hydrogen enggau Gerempung Pemansang Ekonomi Sarawak (SEDC).

3.UNGKUP DIBERI NGAGAI 24 PBT DIKENA NGAGA 469 ITI PROJEK INFRASTRUKTUR

Opis Menteri Kaunsil Kandang Menua enggau Pengawa Berumah udah ngemendar ungkup penyampau RM91.18 juta taun tu ngagai 24 iku piak bekuasa kandang endur (PBT) dikena bejadika 469 iti projek infrastruktur.

Menterinya Dato Sri Dr Sim Kui Hian madahka, projek nya nyengkaum ngaga parit, landskap, jalai alun, lampu trafik, makit, tamu, enggau ke bukai.

Naka ke diatu ku iya, penyampau 290 iti projek udah tembu lalu 179 iti agi projek agi ba renggat benung dipejalai.