Sebuah Bas Labuh Ke Dalam Sungai Di Rusia

1. SEBUAH BAS LABUH KE DALAM SUNGAI DI RUSIA

19 iku orang ti nepan sebuah bas bebadi sepengudah bas nya tepawah, lalu labuh ke dalam sungai di timur Siberia, kemari.

Nangkanka nya, 22 iku ke bukai diripotka bakal dalam penusah ti nyadi urung jam 9.39 pagi kemari.

Ku Opis Menteri Penusah Ngenyit Rusia dalam siti penerang madahka bas nya benung bejalai nuju mengeri Sretensk, urung 4,900 kilometer ngagai timur Moscow.

Lebuh penusah nya nyadi, bas nya mai urung 43 iku pasinjir enggau siku deriba.

Asil pansik madahka kebuah penusah nya nyadi ketegal penanggul ba tayar depan bas nya lebuh bas nya mansa jematan alai penusah nya nyadi.

2. 24 IKU ORANG BEBADI DALAM PENUSAH DI TUNISIA

Siti agi penusah ti nyadi bekaul enggau bas, ianya di makit Amdoun di utara Tunisia kemari, ti ngujungka 24 iku orang bebadi.

Bas nya tepawah sepengudah deriba bas enda mujur ngawal bas nya ba sebuah simpang ti tajam lalu labuh ke dalam gaung.

Ku siku pegawai Opis Menteri Perubat, bas nya mai penyampau 43 iku orang pasinjir.

Presiden Kais Saied enggau Menteri Besai Youssef Chahed ngelawa palan alai penusah nya nyadi di pelilih menua barat laut Tunisia, ianya siti palan dagang temuai tang taja pia, palan nya ngembuan infrastruktur ti enda manah.

3. BANGLADESH PERTIMBANG HARAMKAN E-ROKOK, VAPE

Bangladesh melin enda ngemendar pengawa nyual sereta nguna insap karan tauka dikumbai vape, lebuh nengeri di selampur dunya enda ngemendar mensia mayuh begunaka insap karan laban ti ulih meri penanggul ngagai pengerai kelebih agi ngagai raban nembiak.

Ku Sekretari Unit Pelajar Pengerai enggau Pengelantang Pendiau Ruang Bilik, Shaikh Yusuf Harun, sida benung chakah deka nagang pengawa ngasil, import sereta nyual insap karan enggau semua vape bagi nyaga pengerai mensia mayuh.

Pekara tu ketegal Opis Menteri Pengerai berundingka sekeda pemati sereta penyakit ti datai ari pengawa nguna insap karan di Amerika Syarikat.

Pengawa nagang sereta enda dikemendar tu deka dipasuk ke dalam pelasar nagang timbak 2019, ke diatu dipelin piak perintah.

Sepengudahnya, iya deka diperambu di Parlimen ngambika pelasar nya dikemendar.