Sarawak Enda Besetuju Enggau PH, Rumah Panjai Dipegai Dua Iku Tuai

SARAWAK ENDA BESETUJU ENGGAU PH, RUMAH PANJAI DIPEGAI DUA IKU TUAI

Ulah Pakatan Harapan (PH) bejaku sentang pekara bekaul enggau ketuai raban bansa dipeda deka mambarka Sarawak.

Ulah PH nya baka mandangka pengelemi sida ngelala tauka nemu struktur rama peranak enggau main asal rayat di Sarawak.

Ku Sapit Kepala Menteri, Tan Sri Datuk Amar James Jemut Masing, prosedur standard ba dalam pengawa nyiri ketuai raban bansa udah lama dipejalaika sebedau tu.

Dalam kes komuniti Iban ku iya, Tuai Rumah dichiri ketuai ti megai sida sebedau pengawa nyiri nya dikemendarka perintah.

Lalu pekara nya sama enggau komuniti Orang Ulu, tang pengawa nyiri ketuai raban bansa sida nitihka atur sida empu bepelasarka  struktur rama.

Sarawak enda besetuju enggau perintah PH nyendika dua iku tuai rumah megai sebuah rumah panjai.

PROGRAM SOULS NGANGKATKA PENGELANDIK RABAN NEMBIAK SARAWAK

Program Sarawak Youth Leaders SOULS manah diteruska ba serata Sarawak dikena meri penau penemu ngagai raban nembiak nguasa penemu nyadi ketuai dalam era ekonomi digital enggau revolusyen 4.0.

Menteri Muda Pengawa Melin Mengeri, Pengatur Tanah enggau Rampa Menua, Datu Haji Len Talif Salleh madah, iya nyukung penuh program SOULS diatur ba serata Sarawak.

Maya program SOULS diatur, mayuh kaban udah nyulut megai pangku pengawa baka Presiden Komiti Tinggi Sarawak Dayak Graduate Association (SDGA), Sapit Presiden Kanan Sarawak Dayak National Union (SDNU), Kaban Parlimen Belia Malaysia (APMB)sereta nyereta Asia World Model United Nation (AWMNU).

Program nya diatur begempung enggau Sarawak Multimedia Authority (SMA) lalu siti chara proaktif dikena nyendiaka modal mensia seriris enggau penumbuh Digital Innovation Hub.

PENGAWA BEDAJA BISI NAPI PEMAR KETEGAL SEBUN ASAP

Pengawa sida bedaja bisi napi pemar mimit ketegal sebun asap ke agi mengkang nyadi ba Sarawak ketebal agi ba mengeri Kuching.

Ku Azim, siku orang bedaja barang pemakai, asil ti diulihka iya bisi ngayanka pengusut ti dibanding sebedau penusah sebun asap nyadi.

Pia mega, ku Rohana, penyampau orang ke meli barang didaja nurun muak ke saing tang, muak ke malam hari, iya bisi nerima penyampau orang ke meli bisi niki mimit.

Ku Muhammad Faizal, penusah sebun asap enda nagang bala mensia mayuh datai ngagai palan endur iya bedaja.

Nya disadang iya ketegal musin kemisi nyerumba pengerami Hari Malaysia ti diatur di Kuching taun tu.