Ribut Puting Beliung Tapah Mangka Barat Jepun
1. RIBUT PUTING BELIUNG TAPAH MANGKA BARAT JEPUN
Pengerembai berita ribut puting beliung ba Jepun.
Ribut puting beliung balat benung nuju timur laut pulau Honshu di Jepun sepengudah mangka ba kandang endur selatan pulau nya.
Ribut nya nabanka ujan kudi, ngasuh ampuh bah, ngerusak trafik enggau sekeda mensia mayuh bakal mimit.
Puting beliung Tapah mangka dalam pejalai ngagai Nagasaki di selatan Jepun sebedau mangka endur selatan Jepun nyengkaum Okinawa.
Ku Ejinsi Meteorologi Jepun, puting beliung nuju tunga timur laut enggau pengelaju 30 kilometer tauka 19 batu sejam.
2. TANAH BERENYANG NYADI DI ALBANIA, 68 IKU MANSA BAKAL
Tanah berenyang enggau pemalat magnitud 5.8 nyadi tunga barat Albania demalam.
Tang, semina ngasuh penusah bakal mimit, nitihka ripot piak bekuasa menua nya.
Ku Institusyen GeoSciences, Kuasa, Ai enggau Rampa Menua , Opis Menteri Pengetan Albania, tanah berenyang nya nyadi 13 kilometer di utara mengeri port Durres, ba Kepi i Rodonit, urung pukul jam 2:04 pagi jam menua nya.
Penusah tanah berenyang nya ulih diasaika ba sepemanjai pantai barat Albania.
Penusah ti sama enggau pemalat magnitud 5.3 ngerusak rumah enggau palan pendiau peranak sereta sida napi penusah putus kuasa karan.
Menteri Pengerai Albania madah, ripot mandangka lebih kurang 68 iku mansa bakal, tang enda entu balat tauka nadai mansa parai.
3. POLIS NIMBAK GIS PEMEDIS MATA NGERARA MENSIA MAYUH MANTAH
Polis Nicaragua kemari ngerara bala mensia mayuh mantah anti perintah enggau gis pemedis mata, bom jari enggau peluru getah.
Lebih kurang dua iku ari sida bakal.
Bala mensia ke mantah mai gelembung biru enggau burak sereta betugung bebala mayuh ba mayuh palan di Managua.
Demonstrasyen nya diatur laban ngutuk pemarai siku nembiak benama Matt Romero lebuh pengawa ke sama taun siti nyin suba sereta ngansak pengawa bepilih baru nganti Presiden Daniel Ortega.
Beratus iku rayat Nikaragua parai dibunuh, dijil tauka dibuai bepun ari pengawa mantah Ortega berengkah bulan April 2018.
