Pengereja Pengawa Bejimat Meresi Bekau Jematan Genoa Ke Runtuh
PENGEREJA PENGAWA BEJIMAT MERESI BEKAU JEMATAN GENOA KE RUNTUH
Pengawa meresika sekeda laluh jematan Morandi, jalai besai ba mengeri Genoa Itali ke runtuh maya bulan Ogos suba ke munuh 43 iku orang.
Bala injinir ngabiska bejam-jam timpuh ari enam kemari, nurunka batang jalai ke ngembuan pemanjai 36 meter tauka 118 kaki ke nyadi sebengkah pengawa deka ngerubuh sereta meresika jalai ungkup ngaga jematan baru.
Berebak enggau nya, operasyen ke dipejalaika beguna ke masa ketegal jematan ke enda tegap nya besemak enggau genturung pendiau ke ngembuan mayuh peranak.
Pun kebuah jematan nya ke runtuh rambau 14 Ogos nya bedau ditemu piak bekuasa, tang pendawa benung mansik sentang pengurang pengatur enggau pematau tauka langkar jematan nya ke enda engkeman ungkup jematan nya ke udah manggai 51 taun.
Arkitek Hometown Renzo Piano udah mujur ngelangkar pelin jematan baru ke nyerumba baka busur kapal ke nitihka chara bebasa pengawa belayar Genoa lalu jematan nya dipasang enggau 43 buah lampu dikena meri pengingat ngagai mansa ke bebadi nyawa.
PENUSAH KAMPUNG ANGUS BA NEW ZEALAND MAKIN NYADI
Gaya angin ke balat bepuput dipelaba ngasuh penusah angus ba kampung makin nyadi dalam timpuh seminggu ke udah ba South Island, New Zealand, lalu ngansak beribu iku peranak ke besemak kandang endur nya ninggalka rumah sida.
Nitihka penerang ari Opis Pengetan Sivil New Zealand nengah laman web, penusah angus ke nyadi ba Lembah Pigeon nyengkaum genturung 2,300 hektar enggau 25 kilomter perimeter.
Naka ke diatu nadai bisi orang bebadi nyawa diripotka lalu semina sebuah rumah ke bisi kena tinggang penusah sereta bisi pengirau sentang gaya angin balat bepuput ke dipelabaka tengah ari tadi sereta nguji garis pematau.
Berindik enggau nya, 155 iku raban sedadu ngawal pengerekai penusah angus enggau bantu nengah langit nyengkaum 23 buah bilun engkabang enggau 3 buah pesawat ke nyadi chara dikena madamka api ke nyadi ba menua nya.
MAYUH CHALUN NGANJUNG NAMA BETANDING NYADI PRESIDEN ALGERIA
Mayuh orang deka enggau betanding nyadi presiden Algeria ba dalam pengawa bepilih besai bulan April menua nya, ba tetengah pekara ke bedau ditemu ke makin betambah sentang Abdelaziz Bouteflika ke lemi sepengudah napi penusah 2013, engkeman ungkup seiti penggal sepengudah dua dekad ke megai tanggungpengawa ngagai menua Afrika Utara ke kaya enggau gis.
Berebak enggau nya, dalam timpuh dua minggu ke udah pengawa bepilih nya dilancarka, urung 186 iku orang nganjung nama deka nyadi chalun nyadi presiden.
Penyampau nya lebih ari dua kali lipat penyampau chalun ke ngembuan potensi ba renggat diatu sereta ari pengawa bepilih kepenudi ba taun 2014 suba.
Berindik enggau nya, mayuh ari sida enda ngulihka sain jari enggau chara resmi dikena ngulihka undi maya 18 April ti ka datai sereta jajaran chalun ngayanka mayuh sida deka napi pemutus ke enda patut enggau status quo.
