Entukar Safari Digagai Jelu Rimau

1. ENTUKAR SAFARI DIGAGAI JELU RIMAU

Gerup temuai di utara India rawan ati sereta takut kemari lebuh entukar safari sida digagai siku rimau indu.

Rikot video ti diambi ba Taman Negara Ranthambore, utara India nengeri Rajasthan, ngayanka entukar nya ngetu ba jalai lebuh temuai ngambi gambar jelu rimau indu ti dikumbai Sultana.

Pengudah entukar nya mupuk bejalai, rimau indu nya ngenyit ngagai sida enggau penyauh kira-kira 30 meter.

Deriba nguji ngemba rimau nya enggau nekan minyak entukar inggar, sebedau jelu nya dipeda ngelarika diri midang tama babas.

Sekeda peranak di endur nya nyalahka pemansang dagang temuai ke ngena entukar safari ti mansutka asap lalu ngujungka jelu siga ngeransi.

2. LIMA IKU PASINJIR NEPAN “CLIFFHANGER” TEPELANTING LABUH

Penusah ke ngasuh alit ati sereta kesal lebuh sekeda ari orang ke bemain nepan ayun tepelanting labuh ke baruh lebuh bar pengelikun perengka nya tebuka.

Empat belas iku sida ke nepan ‘cliffhanger’ ba karnival di Lopburi, Thailand tengah, demalam urung pukul 9 malam.

Maya lengan mekanikal ke ngetan bala pasinjir nya nurun, bar logam ke megai sida tekinsit lalu tebuka.

Rikot video ari orang ke ngemataka sida ngayanka, lima iku ari pasinjir labuh ari palan endur duduk lalu ngelantak platform besi atas ayun ke ngena tema Pirates of the Caribbean nya.

Tajapan pia, baka ke disangkung nadai bisi ari sida napi pemedis tauka bakal.

Jaga ke matau endur nya sikal madamka mesin nya seraya lima iku pasinjir nya tadi dipeda angkat sereta bekejang ari endur nya nadai ngawa.

3. 14 IKU PARAI BETIMBAK DI GARIS MENUA TEXAS

Tim pengelikun Mexico belaban timbak pengelama sejam saritu tadi enggau saspek kartel ti dipelabaka ba Villa Union, sebuah mengeri di Coahuila.

Endur nya kira-kira sejam deriba ngagai barat daya Eagle Pass, Texas.

Ku Pemesai madah, 14 iku parai dalam penusah betimbak nya.

Gabenor Coahuila, Miguel Angel Riquelme madah ngagai pengarang berita, entara mansa parai nyengkaum empat iku pemesai polis, enggau sekeda pengereja kaunsil nengeri lenyau.

Iya madahka, gerup besenyata nyerebu mengeri ti ngembuan 3,000 iku peranak nya ngena trak konvoi.

Sida nyerang opis perintah sereta ngansak tim perintah nengeri enggau besai campur tangan.

Sepuluh iku raban tim kartel di Timur Laut parai dalam penusah ke sama.