Enda Ngamatka Manifesto Kebuah PH Alah Di Tanjung Piai

1. ENDA NGAMATKA MANIFESTO KEBUAH PH ALAH DI TANJUNG PIAI

Enda nitihka manifesto PRU14 ngujungka Pakatan harapan (PH) enda mujur ngetanka Tanjung Piai dalam pengawa bepilih mit (PRK), kenyau hari Enam tu tadi.

Sapit Kepala Menteri Tan Sri Datuk Amar James Masing dalam siti penerang ti dipansutka kemari, ianya iya pechaya, kebuah pekara tu nyadi laban pemegai PH ti seruran ngambi muntang peminta pengundi sida.

Entara pun kebuah PH alah ketegal ianya keterubah, “berita pelesu tauka enda engkeman” enggau ‘danji manis’ ti enda dikeamatka, lalu iya ti kedua, dipelaba bukti rayat diatu udah nemu reti ‘enti nyema enda ngamatka danji, perintah nya semina ulih megai sepenggal aja’.

2. SUAH NYALAHKA PERINTAH TI DULU, ENTARA KEBUAH PH ALAH

Ba pengerembai ke bukai, ku Datuk Abdul Karim Rahman Hamzah, ulah ti suah deka nyalahka perintah ke sebedau tu, belaya enggau pangan diri sereta enda ngamatka manifesto ianya entara kebuah PH enda mujur ngetanka Tanjung Piai dalam Pengawa Bepilih Mit (PRK), kenyau hari enam tu tadi.

Ku iya, rayat pechaya sereta ngarapka PH ulih mai pemaik tauka pemansang sepengudah nyulut dalam PRU14 lalu enda sepatutya ngambi muntang pekara tu.

Sebedau tu, chalun Barisan Nasional, Datuk Seri Dr Wee Jeck Seng,mujur PRK nya enggau majoriti 15,086 undi, dalam pekit enam penjuru, lalu sekaligus ngalahka chalun Pakatan Harapan, Karmaine Sardini.

3. WANG TURU RM4 JUTA DEKA DIPASUK NGAGAI TABUNG RABAN NEMBIAK TEROKA SARAWAK

Pemujur enggau pengelantang raban nembiak di Sarawak seruran dikemeratka perintah Sarawak dalam mayuh macham sukut.

Tu ketegal penyulut enggau pengelandik sida jemah ila ulih mantu nyungkak tikas pemansang di nengeri tu.

Menteri Raban Nembiak enggau Lumba Pelancongan Sarawak Datuk Abdul Karim Rahman Hamzah madah, enggau nya penyampau RM4 juta wang turu dipasuk ngagai Tabung Raban Nembiak Teroka Sarawak bepun taun baru.

Iya madah, ungkup nya tadi dikena nambahka penyampau RM5 juta ti udah dikemendarka Kepala Menteri Datuk Patinggi Abang Zohari Tun Abang Haji Openg rambau TEDxKenyalang taun siti nyin suba.

Iya mansutka jaku nya maya Pengerami Nutup TEDxKenyalang 2019 di Kuching kemari. .

Raban Nembiak Sarawak ulih nguji minta wang turu tu ti sema sida bisi pengingin ati deka ngemansangka pengelandik enggau pematih diri nengah mayuh macham kus, enda ibuh dibayar pulai, tang peminta sida nya meseti nerima pemendar ari komiti.

Pia mega, iya madah Perintah Sarawak seruran nyukung program ti diatur ke ulih meri penyulut sereta pemansang ngagai raban nembiak.