Apai Munuh Kaban Ti Sekelas Enggau Anak Iya

APAI MUNUH KABAN TI SEKELAS ENGGAU ANAK IYA

Siku apai diukum parai sepengudah dipadah besalah nikau siku nembiak lelaki ti beumur semilan taun dalam kelas ketegal ti udah beduan anak indu iya.

Lelaki ti benama Wang nya nikau nembiak lelaki nya penyampau enam kali nyentuk parai, sehari sepengudah anak iya madahka diri dipeduan mansa.

Wang didawa besalah ketegal dawa munuh enggau sengaja ari kort pelilih menua Jiangxi kenyau hari lima ti udah lalu diukum parai.

Penusah nya nyadi kenyau 10 Mei ti udah, di Sekula Primari Shangrao di Jiangxi.

RIBUT KAMMURI DEKA NYADI LALU NGACHAU PEKIT SUKAN SEA

Filipina bedepan enggau Ribut Kammuri sepengudah ribut nya majak dampih, lalu ngujungka rayat mindahka diri. Penusah tu mega deka ngachau acara Sukan SEA ti bedampih enggau nengeri nya.

Ku Opis Pemata Gaya Mua Hari, Kammuri disadang deka nyadi ba laun lemai sehari tu tauka tumu pagi pagila di timur Filipina enggau ujan ti balat sereta angin kuat ti ngembuan pengelaju 185 kilometer sejam.

Nitihka ripot, ribut nya diatu benung nuju kandang endur ti bedampih enggau Manila, ianya siti kandang endur ti ngembuan penyampau 13 juta pengani enggau mega palan alai endur bepekit Sukan SEA.

Nyauka 70,000 pengani di kandang endur nya udah mindahka diri ngagai pelilih menua Bicol, ti dipelaba deka nyadi palan alai ribut nya datai.

PENYARUT MAJAK NYADI ENTARA POLIS ENGGAU KARTEL DADAH MEXICO

Piak bekuasa madahka penyampau orang ti parai dalam penyarut ti nyadi entara polis enggau raban kartel dadah di utara Mexico ujung minggu tu tadi majak nambah ngagai 21 iku orang.

Pekara tu mega ngujungka penyarut majak nyadi, berindik ari ikrar ti dipansutka Presiden Donald Trump ti madahka orang ti nyual dadah nya raban orang ganas.

Presiden Andres Manuel Lopez Obrador, deka pelasar ngurangka kontroversyen ti ngalahka kartel dadah demalam madahka enggai nerima sebarang campur tangan ari piak luar. Iya deka nambahka agi strategi tauka chara iya dalam ngatur penanggul tauka chara dikena nyeliah penusah ganas ari majak nyadi.

Taja pia, mayuh pemati diripotka nyadi maya pengerami nyambut anniversari iya ti keterubah megai pangku pengawa nyadi Presiden lalu mensia mayuh begelumu di mengeri Mexico dikena protes penusah ganas.